Kamp Trajnimi: Konservimi i objekteve arkeologjike dhe përgatitja për muzealizim i koleksionit arkeologjik të Muzeut të Beratit

Zbatues

QEND.NDERKOMB.PER ARKEOLOGJINE SHQIPTARE

Përshkrimi

Një Kamp Restaurimi Arkeologjik do të organizohet si një bashkëpunim mes Ministrisë së Ekonomisë, Kulturës dhe Innovacionit, Departamentit të Arkeologjisë dhe Trashëgimisë Kulturore të Universitetit të Tiranës, Bashkisë Berat dhe Qendrës Ndërkombëtare për Arkeologjinë Shqiptare. Objektivi është sjellja së bashku e studentëve dhe profesionistëve të rinj në një përvojë teorike dhe praktike me objekt konsrvimin e artifakteve arkeologjike (rreth 200 të tillë prej qeramike, bronzi, hekuri, qelqi) që i përkisnin dikur koleksionit të Muzeut Historik të Beratit (i mbyllur prej më shumë se 30 vjetësh). Ky koleksion i dokumentuar dhe konservuar sipas kritereve bashkëkohore, do të përbëjë bërthamën e një Muzeu të ri Arkeologjik të qytetit. Berati është një qytet historik, regjistruar në 2008 si Pasuri Botërore nga UNESCO. Plani i tij urban dhe arkitektura rezidenciale e periudhës otomane përfaqësojnë shembullin më të mirë të një qyteti Ballkanik të shekujve të 18të dhe 19të. Muzeu historik i qytetit ka qenë mbyllur qysh në fillim të viteve 1990. Për më shumë se 30 vjet, koleksioni i vogël, por shumë cilësor arkeologjik ruhet i mbyllur në mjediset e Muzeut Etnografik, por i pakonservuar prej më shumë se katër dekadash. Statusi i pasurisë botërore e ka sjellë Beratin në vëmendjen e një numri gjithmonë në rritje vizitorësh. Bashkia është e interesuar për të bashkëpunuar me MEKI-n, UT-në dhe partnerët nga shoqëria civile për ngritjen e Muzeut të ri Arkeologjik. Ky projekt do të krijojë bërthamën rreth të cilës do të mund të ngrihet ky muze. MEKI do të mund ta pasurojë ndjeshëm koleksionin me gjetje të tjera të rëndësishme të viteve të fundit. Muzeu do të prezantojë në mënyrë bashkëkohore traditat kulturore lokale si dhe historinë e përbashkët europiane që nga periudha e shfaqjes së bujqësisë dhe jetës sedentare, e deri në periudhën e vonë Mesjetare.