Mbështetje për Shkencën dhe Teknologjinë në Shqipëri dhe Kosovë – Shkolla Intensive e Ekselencës në Universitetin e Bernës,Zvicer, Fakulteti i Shkencave – Instituti i Fizikës – Laboratori për Fizikën dhe Energjinë (LHEP)

Zbatues

Shoqata “Rotary Club Tirana”

Përshkrimi

Ofrohet një mundësi e veçantë për herë të parë në këtë rajon.

Me anë të këtij programi të ndërmarrë nga Universiteti i Bernës, krijohet një mundësi e artë dhe hapen horizonte të reja të dijes për pjesëmarrësit tanë, duke i përgatitur ata për një karrierë të sigurt dhe premtuese në kërkimin shkencor të niveleve më të larta. Duke përkrahur dhe përgatitur këto mendje të reja të ndritura dhe talente unike të moshës 15-17 vjeçare, fitues të olimpiadave dhe garave kombëtare në fushat e Fizikës dhe Matematikës, si dhe studentët ekselentë, sigurojmë një paketë ndihme të domosdoshme për mbulimin e kostos së pjesëmarrjes në Shkollën Intensive (përfshirë shpenzimet për shkollimin, udhëtimin dhe jetesën).

Ky bashkëpunim synon të arrijë jo vetëm pjesëmarrjen e talenteve shqiptare në projektet kërkimore dhe shkencore të avancuara, por edhe mundësinë e udhëheqjes nga mentorë shkencëtarë lider në nivele botërore. Kjo do të vendosë gurët e themelit në ndërtimin dhe integrimin e tyre në të ardhmen në rrjetin shkencor të ekspertëve, duke e radhitur Shqipërinë dhe Kosovën si potencial konkurrues në zhvillimin botëror.

Do të vlerësojmë shumë çdo kontribut tuajin që do të ndihmonte në mundësimin e realizimit të kësaj nisme për pjesëmarrjen e nxënësve në këtë program prestigjioz, që po prezantohet këtë vit për herë të parë në Shqipëri dhe Kosovë, por që shpresojmë shumë të bëhet traditë në projektet e Distriktit tonë në të ardhmen për një investim të sigurt në fushën e dijes.